कोळगाव – जोड पाच तालुके, चार जिल्हे यांची

कोळगाव हे जळगाव जिल्ह्याच्या भडगाव तालुक्यातील मध्यवर्ती असे महत्त्वाचे गाव आहे. ते गाव एकटे, सुटे असे नाही; त्याला लागून पूर्वेला पिंप्रीहाट नावाचे गाव एक किलोमीटर अंतरावर आहे. त्यामुळे गाव कोळगाव-पिंप्री या नावाने ओळखले जाते. एस टी स्टँडवर उतरल्यावर तेथील गजबजलेला परिसर पाहून गाव खूप मोठे आहे असा प्रथमदर्शनी भास होतो. त्या ठिकाणी असलेली हॉटेले, अनेक प्रकारची दुकाने, तऱ्हतऱ्हेची सरकारी-निमसरकारी कार्यालये – स्टँडला लागूनच असलेली जुनी पोलिस चौकी, पाटबंधारे खात्याचे ऑफिस-बंगला, जवळच असलेले वीज महामंडळाचे सबस्टेशन – कर्मचाऱ्यांसाठीची कॉलनी, हायस्कूल व कॉलेज आणि महादेव मंदिर. तेथेच पंधरा-वीस घरांची दक्षिणोत्तर दलित वस्ती आहे. त्याच्या खुणा बिऱ्हाडे गुरुजींचे घर ते नाना मास्तरांचे घर अशा गंमतीदार पद्धतीने सांगितल्या जातात. त्या घरांची वर्दळ तेथे असतेच. त्यामुळे स्टँड सकाळ-संध्याकाळ कायम गजबजलेला असतो.

कैऱ्या आणि इतर शेतमाल यासाठी शेतकरी धुळ्यालाही जात. धुळ्याला जाणारा शॉर्टकट रस्ता हा बराचसा जंगलातून जात असे. जंगलात बऱ्याच वेळा लूटमार होई. गाडीवानांना मारझोडही होई. गावातील बरेच जण शेतमाल विक्रीसाठी, डॉक्टरांसाठी आणि त्यांच्या इतर कामांसाठी धुळ्याला पसंती देत. गावातील आणि गाव परिसरातील बरीच मंडळी कामधंद्यासाठी मात्र नाशिककडे झुकत. कजगाव स्टेशन कोळगावला जवळ. तेथून  नाशिकला जाण्यास रेल्वे सोयीची पडते. त्यामुळे वेळेची व पैशांची बचत होते. आता, चांगल्या वैद्यकीय सेवेसाठीही नाशिक फायदेशीर वाटते.

कोळगाव परिसरातील लोक नोकरी निमित्ताने- विशेषत: शिक्षकाच्या नोकरीसाठी संभाजीनगर जिल्ह्याला पसंती देतात. आमचे गाव हे पाच तालुके आणि चार जिल्हे यांना अशा प्रकारे जोडले गेले आहे. वाहतुकीची साधने व सोयी वाढल्याने तालुकेच काय पण संबंधित चारही जिल्ह्यांच्या ठिकाणी मुक्काम न करता एका दिवसात जाणे-येणे सोयीचे झाले आहे.

– साहेबराव महाजन 9763779709