श्रीकृष्ण सुतार
श्रीकृष्ण सुतार यांचे शिक्षण दहावीपर्यंत पाचल गावी सरस्वती विद्यामंदिर येथे झाले. त्यानंतर ते इंटिरियर डेकोरेशनने व्यवसायानिमित्त ठाणे येथे 2018 पर्यंत वास्तव्यास होते. ते पुन्हा गावी राहू लागले आहेत. त्यांचा मोठा मुलगा आणि सून डॉक्टर आहेत. ती दोघेही पाचल गावात प्रॅक्टिस करतात. त्यांची दोन मुले ठाण्यात वास्तव्यास आहेत.
श्रीदेव केदारलिंग : पाचलचे ग्रामदैवत
केदारलिंग हे पाचलचे ग्रामदैवत. पाचल हे कोकणच्या राजापूर तालुक्यातील गाव. केदारलिंग मंदिर गावाच्या मध्यभागी आहे. पाचल गाव कोंड-दिवाळवाडी रस्त्यावर येते. मंदिर रस्त्यालगत दाट वनराईत वसलेले असे आहे -लाकडी, कौलारू आणि टुमदार. मंदिराच्या डाव्या बाजूला ‘ब्राह्मण देवराई’ आणि मागील बाजूला ‘रामेश्वर देवराई’ आहेत. केदारलिंग हे शंकराचे देवस्थान. पण त्या देवळात गाभारा किंवा पिंडी नाही. देवळाला कळस नाही. देवळात पुरातन पाषाणमूर्ती विराजमान आहे. आसनस्थ पाषाण मध्यभागी; केदारलिंग देवाच्या उजव्या बाजूला धनीणबाय, रामेश्वर, कालकादेवी, पावणादेवी, देवाच्या डाव्या बाजूला नवशादेव, ब्राह्मणदेव, ईठलादेवी, नवलादेवी आणि समोर खाली गणपती...