रवींद्र बेम्बरे

रवींद्र वैजनाथराव बेम्बरे हे देगलूरच्या वै. धुंडा महाराज देगलूरकर महाविद्यालयात मराठी विषयाचे प्राध्यापक आहेत. त्यांनी ‘इंद्रजित भालेराव यांच्या कवितेतील शेतकरी : एक चिकित्सक अभ्यास’ या विषयावर संशोधन करून पीएच डी पदवी मिळवली आहे. तसेच, ‘संत तुकारामांचा संत विषयक दृष्टीकोन : एक अभ्यास’ या विषयावर विद्यापीठ अनुदान आयोगाकडे लघु संशोधन प्रकल्प सादर केला आहे. त्यांचे प्रतिष्ठान, पंचधारा, अनुबंध, साहित्य, माझी मराठी, विचारशलाका, अक्षरगाथा, सर्वधारा, तुकावाणी, बसवपथ, बसवमार्ग, रिंगण अशा विविध नियतकालिकांत लेख प्रकाशित झाले आहेत. त्यांचे लेखन आघाडीच्या सर्व वर्तमानपत्रांतूनही प्रसिद्ध झाले आहे. त्यांची महाराष्ट्र, कर्नाटक, तेलंगना, गुजरात या तीन राज्यांमधील परिसंवाद, परिषदा, संमेलने, शिबिरे आणि कार्यशाळेत मराठी व कन्नड संत साहित्यावर व्याख्याने झाली आहेत.