सत्य साईबाबांच्या निधनाचे वृत्‍त आज सगळ्या वर्तमानपत्रांमध्‍ये प्रसिद्ध झाले. मात्र त्‍याला अवास्तव महत्‍त्‍व देण्‍यात आले आहे, असे वाटते. वर्तमानपत्रांमध्‍ये साईबाबांवरील पुस्‍तकाचे उतारेच्‍या उतारे देण्‍यात आले आहेत.
सत्य साईबाबांच्या निधनाचे वृत्‍त आज सगळ्या वर्तमानपत्रांमध्‍ये प्रसिद्ध झाले. मात्र त्‍याला अवास्तव महत्‍त्‍व देण्‍यात आले आहे, असे वाटते. वर्तमानपत्रांमध्‍ये साईबाबांवरील पुस्‍तकाचे उतारेच्‍या उतारे देण्‍यात आले आहेत. सत्य साईबाबा हे वादग्रस्‍त व्‍यक्तिमत्‍व होते. ते चमत्‍कार करत असे म्‍हटले जाई. त्‍यांनी समाजकार्य केले असले तरी त्‍यांच्‍याठायी भोंदूपणा होता, हे नाकारणे शक्‍य नाही. त्‍यांमुळे हे वृत्‍त थोडक्‍यात प्रसिद्ध करणे योग्य ठरले असते.
काही पत्रकारांसमवेत मी एकदा सत्य साईबाबांना भेटलो होतो, पण मला त्‍यांच्‍या पाया पडावेसे वाटले नाही. त्‍या वेळी जे त्‍यांच्‍या पाया पडले, त्‍यांना सत्य साईबाबांनी हवेतून ‘चमत्‍कार’ करत अंगठ्या, घड्याळ वगैरे वस्‍तू काढून दिल्‍या, मात्र मी चरणस्‍पर्श न केल्‍याने त्‍यांनी माझ्यावर ती ‘कृपादृष्‍टी’ दाखवली नाही.
दिनकर गांगल हे ‘थिंक महाराष्ट्र डॉट कॉम’ या वेबपोर्टलचे मुख्‍य संपादक आहेत. ते मूलतः पत्रकार आहेत. त्‍यांनी पुण्‍यातील सकाळ, केसरी आणि मुंबईतील महाराष्ट्र टाईम्स या वर्तमानपत्रांत सुमारे तीस वर्षे पत्रकारिता केली. त्‍यांनी आकारलेली ‘म.टा.’ची रविवार पुरवणी विशेष गाजली. त्‍यांना ‘फीचर रायटिंग’ या संबंधात राष्‍ट्रीय व आंतरराष्‍ट्रीय (थॉम्‍सन फाउंडेशन) पाठ्यवृत्‍ती मिळाली आहे. त्‍याआधारे त्‍यांनी देश विदेशात प्रवास केला.
गांगल यांनी अरुण साधू, अशोक जैन, कुमार केतकर, अशोक दातार यांच्‍यासारख्‍या व्‍यक्‍तींच्‍या साथीने ‘ग्रंथाली’ची स्‍थापना केली. ती पुढे महाराष्‍ट्रातील वाचक चळवळ म्‍हणून फोफावली. त्‍यातून अनेक मोठे लेखक घडले. गांगल यांनी ‘ग्रंथाली’च्‍या ‘रुची’ मासिकाचे तीस वर्षे संपादन केले. सोबत ‘ग्रंथाली’ची चारशे पुस्तके त्‍यांनी संपादित केली. त्‍यांनी संपादित केलेल्‍या मासिके-साप्‍ताहिके यांमध्‍ये ‘एस.टी. समाचार’चा आवर्जून उल्‍लेख करावा लागेल. गांगल ‘ग्रंथाली’प्रमाणे ‘प्रभात चित्र मंडळा’चे संस्‍थापक सदस्‍य आहेत.
साहित्‍य, संस्‍कृती, समाज आणि माध्‍यमे हे त्‍यांचे आवडीचे विषय आहेत. त्‍यांनी त्‍यासंबंधात लेखन केले आहे. त्यांची ‘माया माध्यमांची’, ‘कॅन्सर डायरी’ (लेखन-संपादन), ‘शोध मराठीपणाचा’ (अरुणा ढेरे व भूषण केळकर यांच्याबरोबर संपादन) आणि ‘स्‍क्रीन इज द वर्ल्‍ड’ अशी पुस्तके प्रसिद्ध झाली आहेत. त्‍यांना महाराष्ट्र सरकारचा ‘सर्वोत्‍कृष्‍ट वाङ्मयनिर्मिती’चा पुरस्‍कार, ‘मुंबई मराठी साहित्‍य संघ’ व ‘मराठा साहित्‍य परिषद’ यांचे संपादनाचे पुरस्‍कार वाङ्मय क्षेत्रातील एकूण कामगिरीबद्दल ‘यशवंतराव चव्‍हाण’ पुरस्‍कार लाभले आहेत.
